Ֆիցոն Պուտինին կփոխանցի Զելենսկու ուղերձը. Սլովակիայի ԱԳՆ

Սլովակիայի արտաքին գործերի փոխնախարար Ռաստիսլավ Խովանեցը հայտնել է, որ վարչապետ Ռոբերտ Ֆիցոն մայիսի 9-ին Մոսկվա կատարած այցի շրջանակում հնարավոր է Ռուսաստանի նախագահ Վլադիմիր Պուտինին ներկայացնի Ուկրաինայի առաջնորդ Վլադիմիր Զելենսկու ուղերձը։

Ազգային խորհրդի կոմիտեի նիստի ժամանակ Ռաստիսլավ Խովանեցը նշել է, որ Ռոբերտ Ֆիցոն հանդիպում կունենա Ռուսաստանի նախագահի հետ, որի ընթացքում կկարողանա փոխանցել Ուկրաինայի նախագահի ուղերձները, քանի որ վերջինիս հետ անցյալ շաբաթ երկու անգամ շփվել է։ Ըստ փոխնախարարի՝ Սլովակիայի կառավարության ղեկավարը նաև հնարավորություն կունենա ՌԴ նախագահից արժեքավոր տեղեկատվություն ստանալ հակամարտության դադարեցմանն ուղղված ջանքերի գնահատականի վերաբերյալ։

Սլովակիայի վարչապետը Երկրորդ համաշխարհային պատերազմի ավարտի տարելիցը կնշի մի քանի վայրերում։ Մոսկվա կատարած այցի ընթացքում Ֆիցոն ծաղիկներ կխոնարհի Անհայտ զինվորի գերեզմանին, իսկ հունիսին նախատեսում է մեկնել Ֆրանսիա։ Մայիսի 7-ին վարչապետն արդեն այցելել է Գերմանիայի Դախաու նախկին համակենտրոնացման ճամբար։

Կրեմլի մամուլի ծառայության տվյալներով՝ մայիսի 9-ին՝ Հաղթանակի օրվա կապակցությամբ, Մոսկվա կժամանեն յոթ օտարերկրյա պատվիրակություններ։