ՏԵՍԱՆՅՈՒԹ. Ալեն Սիմոնյանը 24 ժամ է տվել Նարեկ Կարապետյանին

«Տեղեկացա, որ «Ուժեղ Հայաստան» կազմակերպության վարչապետի թեկնածու Նարեկ Կարապետյանը ինչ-որ ստատուս է գրել և խոսել է բախտի բերմամբ ԱԺ նախագահ դարձած ինչ-որ մարդու մասին»,- թելեգրամյան իր ալիքում հրապարակված տեսանյութում ասել է ՀՀ ԱԺ նախագահ Ալեն Սիմոնյանը։


«Դե, ուժե՛ղ տղա, ես առաջարկում եմ, որ դու գրես՝ դու ո՞ւմ նկատի ունես ասելով՝ բախտի բերմամբ Ազգային ժողովի նախագահ դարձած, և ո՞ւմ նկատի ունես ասելով, որ կազինոներին կամ օնլայն կազինոներին հովանավոր է կանգնել և մարդկանց նստացրել է կազինո խաղալու վրա...Նարե՛կ Կարապետյան, քեզ 24 ժամ ժամանակ․ կամ ընդունիր, որ դու վախենում ես իմ անունը տալ, կամ ընդունիր, որ դու նկատի ունես Հանրապետական կուսակցության որևիցե այլ Ազգային ժողովի նախագահի, կամ որևիցե այլ երկրի, կամ չգիտեմ՝ մի բան հնարիր»,- հայտարարել է Սիմոնյանը:


Հիշեցնենք` «Ուժեղ Հայաստան» կուսակցության խորհրդի անդամ Նարեկ Կարապետյանը գրել էր. «Գիտե՞ք աշխարհում ամենաշատ կազինո խաղացողները որ երկրի քաղաքացիներն են։ Անցած տարի Հայաստանի քաղաքացիները օնլայն կազինոներում պարտվել են 20 մլրդ դոլար: Իսկ ո՞ր քաղաքական գործիչն է սրա հովանավորը։ Ո՞վ է պատմության մեջ մենակ մնալու սեփական ազգին կազինոյի «նստեցնելու» անփառունակ գործով․ տարօրինակ բախտի բերմամբ ԱԺ նախագահ դարձա՛ծը»: