Ռուսաստանում արգելվել է «Ջերմուկ» հանքային ջրի նոր խմբաքանակների վաճառքը

Ռուսաստանի սպառողների իրավունքների պաշտպանության ոլորտը վերահսկող մարմնի հանձնարարականով շրջանառությունից հանվել է ևս 1,1 միլիոն շիշ արտադրանք։

Հիմնվելով «Ռոսպոտրեբնադզորի» հանձնարարականի վրա՝ ռուսական «Честный знак» մակնշման համակարգը կասեցրել է Հայաստանից ներկրված «Ջերմուկ» հանքային ջրի խոշոր խմբաքանակի իրացումը։ Սահմանափակումն առնչվում է այն ապրանքներին, որոնք արտադրվել են 2025 թվականի հոկտեմբերի 23-ից մինչև 2026 թվականի մարտի 27-ն ընկած ժամանակահատվածում։ Արտադրանքի վաճառքի արգելքի հիմք են հանդիսացել ստուգումների ընթացքում հայտնաբերված տեխնիկական կանոնակարգերի պահանջների խախտումները։

Լաբորատոր փորձաքննության տվյալներով՝ առանձին խմբաքանակներում սուլֆատների, քլորիդների և հիդրոկարբոնատի պարունակությունը գերազանցել է թույլատրելի սահմանաչափերը։ Սա անհամապատասխանություն է առաջացրել պիտակի վրա նշված տվյալների և ԵԱՏՄ տեխնիկական կանոնակարգի պահանջների միջև։ Ռուսական կողմը պնդում է, որ նմանատիպ շեղումները կարող են սպառողներին թյուրիմացության մեջ գցել և հնարավոր վտանգ ներկայացնել առողջությանը։

Նախորդ սահմանափակումների հետ մեկտեղ՝ Ռուսաստանում վաճառքից հանված «Ջերմուկ» հանքային ջրի ընդհանուր ծավալն արդեն կազմում է շուրջ 1,4 միլիոն շիշ։ Թվային մակնշման համակարգի օպերատորների փոխանցմամբ՝ արգելափակումն ուժի մեջ է երկրի ողջ տարածքում և կգործի մինչև լրացուցիչ փորձաքննությունների ավարտը։ Արտադրանքը շուկայում կրկին կհայտնվի միայն համապատասխան թույլտվության առկայության դեպքում։

Հիշեցնենք՝ ավելի վաղ Ռուսական «Անկեղծ նշան» (Честный знак) մակնշման պետական համակարգը կասեցրել է «Ջերմուկ» հանքային ջրի խմբաքանակի վաճառքը օֆլայն և օնլայն խանութներում։