Իրանի հոգևոր առաջնորդը հայտարարություն է արել

Իրանի հոգևոր առաջնորդը հայտարարել է, որ տարածաշրջանի կայունությունը հնարավոր է միայն առանց օտարերկրյա ուժերի ներկայության:

Պարսից ծոցի ազգային օրվա առթիվ ունեցած ելույթում Իրանի գերագույն հոգևոր առաջնորդ այաթոլլա Ալի Խամենեին անդրադարձել է տարածաշրջանային անվտանգության հարցերին։ Նա շեշտել է, որ Պարսից ծոցում ամերիկյան զինուժի ներկայությունը անկայունության գլխավոր գործոնն է։ Խամենեիի համոզմամբ՝ տարածաշրջանի ապագան ձևավորվելու է առանց Միացյալ Նահանգների ներգրավման, իսկ օտարերկրյա տերությունների համար այնտեղ տեղ չկա։

Անդրադառնալով ռազմավարական կարևորություն ունեցող Հորմուզի նեղուցին՝ Իրանի առաջնորդը նշել է, որ այդ ջրային ուղու նկատմամբ Թեհրանի վերահսկողությունը կայունության երաշխիք է և համապատասխանում է տարածաշրջանի բոլոր ժողովուրդների շահերին։ Ըստ նրա՝ ամերիկյան ծրագրերի ձախողումից ու վերջին իրադարձություններից հետո Պարսից ծոցում և Հորմուզի նեղուցում սկսվում է զարգացումների նոր շրջափուլ։

Խամենեին հատուկ շեշտադրել է նաև Իրանի պաշտպանական կարողությունները։ Նա հայտարարել է, որ երկրի հրթիռային և միջուկային ներուժը «ազգային ժառանգություն» է, որը պաշտպանվելու է։ 

Այս դիրքորոշումը դիտարկվում է որպես արձագանք Վաշինգտոնի ճնշումներին և Իրանի ռազմական ծրագրերը սահմանափակելուն ուղղված փորձերին։