ԱՀԾ-ն կստանա հեռախոսազրույցների վերահսկման ինքնուրույն իրավասություն

Խորհրդարանական հանձնաժողովի նիստում դրական եզրակացություն է ստացել «Արտաքին հետախուզական գործունեության և արտաքին հետախուզության ծառայության մասին» օրենքում ու հարակից օրենքներում փոփոխություններ նախատեսող օրենսդրական փաթեթը։ ՀՀ արտաքին հետախուզության ծառայության պետ Քրիստինե Գրիգորյանը նշել է, որ փոփոխությունները հիմնված են կառույցի առաջին տարիների փորձի վրա և նպատակ ունեն բարձրացնել գործունեության արդյունավետությունը։

Ըստ Գրիգորյանի՝ 2022-ին ընդունված օրենքի և 2023-ին հիմնադրված ծառայության գործնական կիրառությունը ցույց է տվել որոշ կարգավորումների կատարելագործման կարիք։ Առաջարկվող փոփոխություններով հստակեցվում են ծառայողների նշանակման ու տեղափոխման հիմքերը՝ դրանք համադրելով հանրային ծառայության ոլորտի օրենսդրության հետ։ Սահմանվում է նաև հայրության արձակուրդի հնարավորություն և հստակեցվում է զենքի ու հատուկ միջոցների կրման ու պահպանման կարգը։

Նախագծով վերանայվում են կադրերի ռեզերվի ձևավորման կարգը, ընդլայնվում են խրախուսանքի տեսակները և հնարավորություն է տրվում վաղաժամկետ հանել կարգապահական տույժերը։ Սահմանվում է, որ ծառայության պետի և տեղակալների պաշտոնները կարող են զբաղեցնել բացառապես ՀՀ քաղաքացիները։ Նախատեսվում են նաև մասնագիտական վերապատրաստման մեխանիզմներ, այդ թվում՝ պետական միջոցներով ուսուցումից հետո վաղաժամկետ հեռանալու դեպքում փոխհատուցման պահանջ։

Կարևոր փոփոխություններից է զինվորական կոչումների համակարգից դասային աստիճանների անցումը և սոցիալական երաշխիքների հստակեցումը, ներառյալ՝ բնակելի տարածքի անվտանգությունը, գույքային վնասների փոխհատուցումը և երկարամյա ծառայության միանվագ նպաստը։ Բացի այդ, 2028 թվականի հունվարի 1-ից ծառայությանը կվերապահվի հեռախոսային հաղորդակցության վերահսկման միջոցառումներն ինքնուրույն իրականացնելու իրավունք։

Քրիստինե Գրիգորյանն առաջարկել է փաթեթը քննարկել 24-ժամյա ռեժիմով։ Հանձնաժողովը նախագծին տվել է դրական եզրակացություն։