Կլինի շրջափակում. Թրամփի նոր որոշումը

ԱՄՆ նախագահ Դոնալդ Թրամփը հրահանգել է իր խորհրդականներին նախապատրաստական աշխատանքներ տանել Իրանի երկարատև շրջափակման ուղղությամբ։

Ինչպես հայտնում է Wall Street Journal պարբերականը՝ հղում անելով ամերիկացի պաշտոնյաներին, Թրամփը խորհրդականներին հանձնարարել է նախապատրաստվել Իրանի տևական շրջափակմանը։ Հրապարակման համաձայն՝ նա մտադիր է շարունակել ճնշումները Իրանի տնտեսական համակարգի և նավթի արտահանման ոլորտի վրա՝ սահմանափակելով նավերի մուտքն ու ելքը իրանական նավահանգիստներից։

Պաշտոնյաները պարզաբանել են, որ Միացյալ Նահանգների առաջնորդը շրջափակման պահպանումն ավելի նվազ ռիսկային է համարում, քան ռմբակոծությունների վերսկսումը կամ հակամարտությունից դուրս գալը։

ԱՄՆ մամուլի քարտուղարի տեղակալ Աննա Քելլին թերթի հետ զրույցում նշել է, որ շրջափակումը Վաշինգտոնին հնարավորություն է տալիս «առավելագույն ազդեցություն ունենալ» Իրանի ղեկավարության վրա։ Նա հավելել է, որ Սպիտակ տան ղեկավարի որոշումը կլինի այնպիսին, որը կապահովի ԱՄՆ ազգային անվտանգությունը։