ԱՄՆ-ն Իրանին հզոր հարվածներ հասցնելու պլան է մշակել

Axios պորտալը, հղում անելով իրազեկ աղբյուրներին, տեղեկացնում է, որ ԱՄՆ Կենտրոնական հրամանատարությունը (CENTCOM) մշակել է իրանական թիրախների, այդ թվում՝ ենթակառուցվածքների ուղղությամբ «կարճատև և հզոր» հարվածների շարք իրականացնելու նախագիծ։ Այս քայլի նպատակը միջուկային գործարքի շուրջ ընթացող բանակցություններում առկա փակուղային վիճակի հաղթահարումն է։

Հրատարակությունը նշում է, որ ԱՄՆ Կենտրոնական հրամանատարությունը պատրաստել է Իրանին հարվածների շարք հասցնելու պլանը՝ հուսալով հաղթահարել բանակցային գործընթացի լճացումը։

Ըստ հրապարակման՝ ենթակառուցվածքային օբյեկտներին հավանական հարվածներ հասցնելուց հետո Միացյալ Նահանգները մտադիր է ճնշում գործադրել Իրանի ղեկավարության վրա։ Դրա նպատակն է ստիպել պաշտոնական Թեհրանին վերադառնալ բանակցությունների սեղանի շուրջ և ցուցաբերել առավել մեծ ճկունություն։

Միևնույն ժամանակ, Axios-ի աղբյուրները հայտնում են, որ ԱՄՆ նախագահ Դոնալդ Թրամփը ներկա պահին շրջափակման շարունակումը համարում է ճնշման գլխավոր գործիք։ Այդուհանդերձ, նախագահը պատրաստ է դիտարկել ռազմական ուժի կիրառման տարբերակը, եթե իրանական կողմը զիջումների չգնա։