Հայտնի է՝ երեք ամսվա ընթացքում Իրանում մահապատժի ենթարկվածների թիվը

Իրանի իշխանությունները 2026 թվականի առաջին չորս ամիսների ընթացքում օրական իրականացրել են միջինը հինգ մահապատիժ։

Աբդուլռահման Բորումանդի անվան մարդու իրավունքների հիմնադրամը հայտնում է, որ ընթացիկ տարվա առաջին 117 օրերին Իրանում պաշտոնապես գրանցվել է առնվազն 612 մահապատիժ։ Վերջին երեք շաբաթվա ընթացքում կիրառված բարձրագույն պատժաչափի 15 դեպքերը հիմնականում կապված են եղել քաղաքական դրդապատճառներով ներկայացված մեղադրանքների հետ։ Ըստ իրավապաշտպանների տվյալների՝ մահապատժի ենթարկվածների շարքում առկա են առնվազն 21 քաղաքական բանտարկյալներ և ցուցարարներ, որոնց մեծ մասը բերման էր ենթարկվել 2026 թվականի հունվարին տեղի ունեցած զանգվածային բողոքի ակցիաների ընթացքում։

Միջազգային զեկույցում նշվում է, որ իրականացված մահապատիժների փաստացի քանակը կարող է էականորեն գերազանցել հրապարակված տվյալները։ Սա հետևանք է երկրի դատական համակարգի փակ գործելաոճի և տեղեկատվության հասանելիության սահմանափակումների։ Մասնավորապես, Իրանում համաշխարհային համացանցի պարբերական անջատումները հավելյալ բարդություններ են առաջացնում իրավապաշտպան կառույցների համար՝ դեպքերը լիարժեք փաստագրելու և հանրայնացնելու գործում։

Իսլամական Հանրապետությունում տիրող իրավիճակը մնում է միջազգային հանրության ուշադրության կենտրոնում՝ հաշվի առնելով մահապատիժների կիրառման աճող միտումները։ Հիմնադրամի մասնագետների պնդմամբ՝ թափանցիկության պակասը հնարավորություն չի տալիս հստակ պատկերացում կազմել բոլոր դատավճիռների իրավական հիմքերի վերաբերյալ, սակայն առկա զարգացումները փաստում են ներքաղաքական լարվածության պայմաններում պատժիչ գործողությունների խստացման մասին։