ՏԵՍԱՆՅՈՒԹ. Հայտնի է` ինչ են քննարկել Պուտինը և Արաղչին

Ռուսաստանի նախագահը Սանկտ Պետերբուրգում բանակցություններ է անցկացրել Իրանի արտգործնախարար Աբբաս Արաղչիի հետ՝ անդրադառնալով Արևմտյան Ասիայում կայունության հաստատմանը։

Վլադիմիր Պուտինը հանդիպման ժամանակ շեշտել է, որ Մոսկվան պատրաստ է ներդնել բոլոր ջանքերը՝ բխող Իրանի և տարածաշրջանային մյուս պետությունների շահերից, որպեսզի Արևմտյան Ասիայում հնարավորինս սեղմ ժամկետներում խաղաղություն հաստատվի։ ՌԴ նախագահը տեղեկացրել է նաև Իրանի Գերագույն առաջնորդ Մոջթաբա Խամենեիից ստացված ուղերձի մասին և բարօրություն մաղթել նրան։

Իրանի ԱԳ նախարար Աբբաս Արաղչին երախտագիտություն է հայտնել ռուսական կողմին Թեհրանին ցուցաբերվող աջակցության համար։ Նա բարձր է գնահատել երկու երկրների միջև առկա հարաբերությունների մակարդակը՝ վերահաստատելով դրանք էլ ավելի ամրապնդելու պատրաստակամությունը։

Բանակցություններին ռուսական կողմից ներկա են եղել նաև ԱԳ նախարար Սերգեյ Լավրովը, նախագահի օգնական Յուրի Ուշակովը և ԶՈւ Գլխավոր շտաբի Գլխավոր վարչության պետ Իգոր Կոստյուկովը։ Իրանական պատվիրակության կազմում ընդգրկված են եղել նախարարի տեղակալ Քազեմ Ղարիբ Աբադին և ՌԴ-ում Իրանի դեսպան Քազեմ Ջալալին։