ԱՄՆ նախագահը՝ իր դեմ կատարված մահափորձի մասին

Վաշինգտոնում տեղի ունեցած մամուլի ընթրիքի ժամանակ, որին ներկա էր ավելի քան 2600 մասնակից, հրաձգություն է սկսվել։ Կրակոցների պահին ներկաների մի մասը շտապել է դեպի ելքը, իսկ մյուսները թաքստոց են փնտրել։ Իրավապահ մարմինների պահանջով միջոցառումը տեղափոխվել է, և ներկաները լքել են շենքը, որն այժմ շրջափակված է։ Տուժածների մասին տեղեկություններ չկան։

Կրակողը, ում Թրամփը նույնականացրել է որպես Քոուլ Թոմաս Ալեն, ձերբակալված է։ ԱՄՆ նախագահը նրան բնութագրել է որպես «միայնակ գայլ» և «հիվանդ մարդ»։ Նկարագրելով իրադարձությունը՝ Թրամփը նշել է, որ լսել է հեռվից եկող բարձր ձայն, որը սկզբում շփոթել է ընկնող սկուտեղի աղմուկի հետ։ Նա բարձր է գնահատել Գաղտնի ծառայության տպավորիչ աշխատանքը։

Մահափորձի դրդապատճառների մասին խոսելիս Թրամփը զուգահեռներ է անցկացրել Աբրահամ Լինքոլնի հետ՝ նշելով, որ թիրախում միշտ հայտնվում են ազդեցիկ մարդիկ, ովքեր փոփոխություններ են բերում երկրում։ Հրաձիգի և Իրանի հնարավոր կապի վերաբերյալ հարցին նախագահը պատասխանել է, որ չի կարծում, թե նման կապ կա, բայց հավելել է, որ հաստատ իմանալ հնարավոր չէ։ Նա շեշտել է, որ միջադեպը չի խանգարի իրեն հաղթել Իրանի հետ պատերազմում և թույլ չտալ, որ այդ երկիրը միջուկային զենք ստանա։

Դոնալդ Թրամփը խոստովանել է, որ կատարվածը փոխել է իր տրամադրությունը. նա որոշել է նախապես պատրաստված սուր ելույթի փոխարեն լինել ավելի «հաճելի և ձանձրալի»։ Միևնույն ժամանակ նա ընդգծել է, որ տեղի ունեցածից հետո չի դարձել «նևրաստենիկ»՝ վտանգը համարելով իր աշխատանքի մի մասը։