Աբաս Արաղչին կհանդիպի Պուտինի հետ

Իրանի արտաքին գործերի նախարար Աբաս Արաղչին Պակիստանում պաշտոնյաների հետ բանակցությունների նոր փուլ անցկացնելուց հետո մեկնել է Մոսկվա։ Ըստ ԻՌՆԱ-ի՝ նախարարը շաբաթ երեկոյան Իսլամաբադից մեկնել էր Մասկատ, այնուհետև Օմանում կայացած հանդիպումներից հետո կիրակի օրը կրկին վերադարձել էր Պակիստան։

Արաղչիի այցերը Պակիստան, Օման և Ռուսաստան դիտարկվում են որպես դիվանագիտական քայլեր, որոնք նպատակաուղղված են պատերազմի դադարեցմանը և ԱՄՆ-ի հետ համաձայնության հասնելուն։

Ռուսաստանում Իրանի դեսպան Քազեմ Ջալալին հայտնել է, որ երկուշաբթի օրը Մոսկվա կատարած այցի շրջանակում Աբաս Արաղչին հանդիպում կունենա ՌԴ նախագահ Վլադիմիր Պուտինի հետ։ Իրանի ԱԳ նախարարը նաև խորհրդակցություններ կիրականացնի ռուս պաշտոնյաների հետ՝ քննարկելով բանակցությունների ներկա փուլն ու հրադադարին առնչվող հարցեր։