Ապրիլի 24-ին կգործեն դեպի Ծիծեռնակաբերդ տանող անվճար երթուղիներ

Հայոց ցեղասպանության զոհերի հիշատակի օրվա միջոցառումների կապակցությամբ ապրիլի 24-ին՝ ժամը 8:30-ից մինչև 22:00-ն, կազմակերպվելու է քաղաքացիների անվճար տեղափոխումը Ծիծեռնակաբերդի հուշահամալիր։ Փոխադրումն իրականացվելու է «Հրազդան» մարզադաշտին հարող տարածքից երկու ուղղություններով։ Այս մասին տեղեկանում ենք Երևան քաղաքապետարանից։

Առաջին երթուղին կանցնի «Հրազդան» մարզադաշտ - Աթենքի փողոց - Հաղթանակի կամուրջ - Արգիշտիի - Իտալիայի - Խորենացու - Ագաթանգեղոսի փողոցներ հասցեով՝ մինչև մետրոպոլիտենի «Զորավար Անդրանիկ» կայարան։ Հետադարձ ճանապարհը կլինի Ագաթանգեղոսի - Գր. Լուսավորչի - Արգիշտիի փողոցներով, Հաղթանակի կամրջով և Աթենքի փողոցով՝ վերադառնալով «Հրազդան» մարզադաշտ։

Երկրորդ երթուղին կներառի «Հրազդան» մարզադաշտ - Ծիծեռնակաբերդի խճուղի - Լենինգրադյան - Կիևյան փողոցներ ուղեգիծը՝ մինչև մետրոպոլիտենի «Բարեկամություն» կայարան։ Հետադարձն իրականացվելու է նույն ճանապարհով։