Ռուսաստանը Իրանին կարևոր ինֆորմացիա է փոխանցել

Ռուսական հետախուզությունը Իրանին է փոխանցել Իսրայելում գտնվող 55 կարևորագույն էներգետիկ ենթակառուցվածքների օբյեկտների մանրամասն ցուցակ, որը նախատեսված է ճշգրիտ հրթիռային հարվածներ հասցնելու համար։ Այս մասին հայտնում են The Jerusalem Post-ից:

Մոսկվայի և Թեհրանի միջև խորացող ռազմական և հետախուզական համագործակցության վերաբերյալ զեկույցում նշվում է, որ տրամադրված տվյալները հնարավորություն են տալիս Իրանին ճշգրիտ հարվածներ հասցնել Իսրայելի էներգետիկ ցանցին։

Ռուսական կողմը բոլոր հնարավոր թիրախները բաժանել է երեք խմբի՝ ըստ դրանց ռազմավարական նշանակության։

Առաջին մակարդակում ընդգրկված են էլեկտրաէներգիայի արտադրության առանցքային օբյեկտները, որոնց ոչնչացումը կարող է կաթվածահար անել երկրի ամբողջ էներգետիկ համակարգը։ Զեկույցում առանձնացվում է Օրոտ Ռաբինի էլեկտրակայանը՝ որպես առաջնահերթ թիրախ։

Երկրորդ մակարդակում ներառված են կենտրոնական Իսրայելի խոշոր քաղաքային և արդյունաբերական էներգետիկ հանգույցները։

Երրորդ մակարդակը ներառում է տեղական ենթակառուցվածքները՝ հատկապես արդյունաբերական գոտիների տարածաշրջանային ենթակայաններն ու փոքր էլեկտրակայանները։

Ռուսական հետախուզությունը Իսրայելի էներգետիկ համակարգը խոցելի է գնահատում՝ դրա բարձր մեկուսացված լինելու պատճառով։ Քանի որ Իսրայելը «էներգետիկ կղզի» է և չի ներմուծում էլեկտրաէներգիա հարևան երկրներից, նշվում է, որ նույնիսկ մի քանի հիմնական բաղադրիչների վնասումը կարող է առաջացնել էներգետիկ համակարգի ամբողջական և երկարատև փլուզում։ Դա կարող է հանգեցնել լայնածավալ հոսանքազրկումների և տեխնիկական խնդիրների, որոնց վերականգնումը դժվար կլինի։