Ռուսաստանը հույժ գաղտնի տեղեկություն է փոխանցել Իրանին․ ԱՄՆ-ից դեռ չկա արձագանք

Ռուսական արբանյակները մարտի վերջին օրերին լուսանկարել են Մերձավոր Արևելքում գտնվող մի շարք ռազմական և ռազմավարական նշանակության օբյեկտներ, որոնք կարճ ժամանակ անց ենթարկվել են հարվածների։ Այս մասին հայտնում է «Reuters»-ը՝ հղում անելով ուկրաինական հետախուզության հաշվետվությանը։

Տվյալների համաձայն՝ մարտի 21-ից 31-ն ընկած ժամանակահատվածում իրականացվել է 46 օբյեկտի լուսանկարահանում 11 երկրում։ Նշված օբյեկտների թվում են եղել ԱՄՆ ռազմական բազաներ, օդանավակայաններ և նավթային հանքավայրեր։ Հաղորդվում է, որ նկարահանումներից մի քանի օր անց այդ տարածքներին հարվածներ են հասցվել Իրանի կողմից՝ բալիստիկ հրթիռների և անօդաչու սարքերի կիրառմամբ։

Առանձնապես նշվում է, որ ինը նկարահանում իրականացվել է Սաուդյան Արաբիայի տարածքում, որտեղ տեղակայված են «THAAD» հակահրթիռային համակարգերը։ Բացի այդ, վերահսկողության տակ են գտնվել օբյեկտներ Արաբական Միացյալ Էմիրություններում, Հորդանանում, Թուրքիայում, Քուվեյթում, Իսրայելում, Քաթարում, Իրաքում, Բահրեյնում, ինչպես նաև «Դիեգո Գարսիա» ռազմաբազան։

Հաղորդվում է նաև, որ Ռուսաստանը շարունակում է ակտիվ արբանյակային դիտարկումներ իրականացնել Օրմուզի նեղուցի շրջանում։