Իրանը համաձայնել է ԱՄՆ ծրագրի 15 կետերի մեծամասնությանը․ Թրամփ

Իրանը համաձայնել է պատերազմի ավարտի վերաբերյալ Վաշինգտոնի ծրագրի 15 կետերի մեծամասնությանը։ Այս մասին հայտարարել է ԱՄՆ նախագահ Դոնալդ Թրամփը՝ իր ինքնաթիռում, Ուեստ Փալմ Բիչից Վաշինգտոն ուղևորության ընթացքում։

Թրամփի խոսքով՝ Թեհրանի հետ բանակցությունները շարունակվում են թե՛ ուղղակի, թե՛ միջնորդների միջոցով և արդեն տվել են կարևոր արդյունքներ։

«Նրանք համաձայնել են կետերի մեծամասնությանը։ Ինչո՞ւ նրանք դա չպետք է անեին»,- նշել է նա։

ԱՄՆ նախագահը նաև հայտնել է, որ Միացյալ Նահանգները ծրագրում է ևս մի քանի կետ ավելացնել։

Նա հավելել է, որ Թեհրանը Վաշինգտոնին ևս մեկ քայլ է առաջարկել՝ թույլ տալով նավթով բեռնված ևս 20 լցանավերի անցում Հորմուզի նեղուցով։

«Այսօր նրանք մեզ ևս մեկ նվեր մատուցեցին։ Նրանք մեզ տվեցին նավթով բեռնված 20 նավ, որոնց տեղափոխումը կսկսվի վաղը»,- ասել է Թրամփը։

Թրամփը The Financial Times-ին տված հարցազրույցում հայտարարել է նաև իրանական նավթը «զավթելու» իր ցանկության մասին։

«Անկեղծ ասած, իմ նախընտրած տարբերակը իրանական նավթը զավթելն է, բայց ԱՄՆ-ում որոշ հիմար մարդիկ ասում են. «Ինչո՞ւ եք դա անում»։ Բայց նրանք հիմար մարդիկ են», - ասել է ամերիկացի առաջնորդը։