Լավրովը խոսել է Իրանի հետ համագործակցության մասին

Ռուսաստանը Իրանին ԱՄՆ-ի և Իսրայելի հետ նրա հակամարտության շրջանակում հետախուզական տեղեկություններ չի տրամադրում։ Այդ մասին France Télévisions հեռուստաընկերությանը տված հարցազրույցում ասել է ՌԴ արտաքին գործերի նախարար Սերգեյ Լավրովը։

Նա նշել է, որ Մոսկվան Թեհրանին փոխանցել է որոշակի ռազմական նշանակության արտադրանք, սակայն մերժում է այն պնդումները, թե աջակցում է հետախուզական տվյալներով։ Լավրովի խոսքով՝ Պարսից ծոցի երկրներում տեղակայված ամերիկյան ռազմաբազաների կոորդինատները տարածաշրջանում հայտնի են և փակ տեղեկատվություն չեն համարվում։

Նախարարը նաև ասել է, որ իրեն չի զարմացնում, որ Իրանը հարվածներ է հասցնում այդ օբյեկտներին։ Միևնույն ժամանակ, արևմտյան մամուլում, մասնավորապես Wall Street Journal-ում, ավելի վաղ հրապարակվել էին տեղեկություններ, որոնց համաձայն Ռուսաստանը կարող էր ընդլայնել Իրանի հետ ռազմական համագործակցությունը, այդ թվում՝ արբանյակային պատկերների և անօդաչու սարքերի տեխնոլոգիաների տրամադրման մասով։