Բռնության ենթարկված երեխայի քույրն առողջական խնդիրներ ունի. ՀՕՖ տնօրեն

Խորթ մոր կողմից պարբերաբար ծեծի ենթարկված 1 տարեկան 2 ամսական տղայի 3-ամյա քույրը, որը բնակվում էր Արարատի մարզի Դարակերտ գյուղում և գտնվում էր տատիկի խնամակալության ներքո, երկու օր առաջ տեղափոխվել է ՀՕՖ երեխաների պաշտպանության կենտրոն։ Այս մասին News-ի հետ զրույցում հայտնել է կենտրոնի տնօրեն Միրա Անտոնյանը։

«Շատ տեղեկություն չեմ կարող հայտնել, երեխային նոր ենք ընդունել, բժշկական հետազոտություններ է անցնում, լուրջ առողջական խնդիրներ ունի։ Բռնության հետքեր չկան, մտավոր խնդիրներ նույնպես, բայց ֆիզիկական առողջության խնդիրներ ունի։ Դա կարող է լինել անխնամության հետևանք, կարող է այլ պատճառներ ունենալ, առայժմ չենք կարող ասել»,- նշել է Անտոնյանը։

Հարցին՝ նախնական տեղեկություններով, որքան ժամանակ երեխան կմնա ՀՕՖ-ում, Միրա Անտոնյանը պատասխանել է․ «Դեռ հետազոտությունների փուլում ենք։ Պետք է հասկանանք՝ ինչ վիճակ է, ինչպես է այս պրոցեսները տանում։ Ենթադրում եմ՝ երկարատև գործընթաց է լինելու»։

Միրա Անտոնյանի խոսքով՝ վերջին երկու օրերին երեխայի ծնողները չեն այցելել ՀՕՖ և չեն տեսակցել երեխային։