Պետք է օգնենք Ղարաբաղից տեղահանված մեր հայրենակիցներին տնավորվեն Հայաստանում. Փաշինյան

Հայաստանի կառավարությունը պետք է աջակցի Ղարաբաղից տեղահանված հայերին՝ Հայաստանի Հանրապետությունում տնավորվելու համար:  Վարչապետն այս մասին ասել է «Ներառական զարգացում. ձեռքբերումներ և անելիքներ» խորագրով համաժողովի ժամանակ։

«Շատ կարևոր եմ համարում, որ մենք օգնենք Ղարաբաղից տեղահանված մեր քույրերին և եղբայրներին, որ իրենք հոգեբանական փնտրտուքի վիճակից դուրս գան, որովհետև կարծում եմ, որ մենք պետք է կենտրոնանանք նրա վրա, որ օգնենք, ամեն ինչով աջակցենք, որ նրանք ստանան Հայաստանի Հանրապետության քաղաքացիություն, տնավորվեն Հայաստանում և հարատև իրենց ճակատագիրը կապեն Հայաստանի հետ։ Սա քաղաքական և հոգեբանական առումով շատ կարևոր է»,- հայտնել է վարչապետը:

Նիկոլ Փաշինյանն ընդգծել է՝ 2023 թվականից ի վեր անձամբ ևս մշտական կապի մեջ է եղել Ղարաբաղից տեղահանված անձանց հետ, ծանոթացել նրանց խնդիրներին և տվել պատասխաններ:

«2023-ից ի վեր Հայաստանի պետական բյուջեից տարբեր ծրագրերով շուրջ 145 մլրդ դրամ է հատկացվել Ղարաբաղից տեղահանված մեր հայրենակիցների կարիքները հոգալու համար»,- նշել է Փաշինյանը: