Իրանի գերագույն առաջնորդը մերժել է ԱՄՆ-ի առաջարկները. Reuters

Իրանի գերագույն առաջնորդ Այաթոլլահ Մոջթաբա Խամենեին մերժել է Միացյալ Նահանգների հետ լարվածության նվազեցման կամ հրադադարի վերաբերյալ առաջարկները, որոնք Թեհրան էին փոխանցվել երկու միջնորդ երկրների միջոցով։ Այս մասին  հայտնել է բարձրաստիճան իրանցի պաշտոնյան։

Աղբյուրի խոսքով՝ Խամենեի դիրքորոշումը ԱՄՆ-ի և Իսրայելի նկատմամբ «շատ կոշտ և լուրջ» է։ Սա նրա առաջին արտաքին քաղաքականության նիստն էր, սակայն չի հստակեցվել՝ արդյոք նա անձամբ մասնակցել է հանդիպմանը։

Պաշտոնյան նշել է, որ Իրանի առաջնորդը համոզված է՝ «խաղաղության ժամանակը դեռ չի եկել», քանի դեռ ԱՄՆ-ն և Իսրայելը «ծնկի չեն եկել, չեն ընդունել իրենց պարտությունը և փոխհատուցում չեն վճարել»։

Մինչ այդ, ԱՄՆ-ի և Իսրայելի կողմից Իրանի դեմ ռազմական գործողությունները արդեն երրորդ շաբաթն են շարունակվում։ Զոհերի թիվը գերազանցել է 2000-ը, իսկ հակամարտության ավարտը դեռ տեսանելի չէ։

Տարածաշրջանում լարվածությունը խորացնում է նաև Հորմուզի նեղուցի փակ վիճակը։ Նավթային կարևոր այս ուղին հիմնականում չի գործում, իսկ ԱՄՆ-ի դաշնակիցները մերժել են նախագահ Դոնալդ Թրամփի կոչը՝ աջակցել դրա վերաբացմանը։ 

Reuters-ի աղբյուրների փոխանցմամբ՝  Մերձավոր Արևելքի մի շարք երկրներ փորձել են դիվանագիտական բանակցություններ նախաձեռնել՝ պատերազմը դադարեցնելու նպատակով, սակայն Թրամփի վարչակազմը մերժել է այդ առաջարկները։