Իրանի նախագահը հանդես է եկել հայտարարությամբ

Իրանը շարունակելու է հարվածներ հասցնել Մերձավոր Արևելքում գտնվող ԱՄՆ այն ռազմաբազաներին, որտեղից, ըստ Թեհրանի, իրականացվում են գործողություններ իր տարածքի դեմ։ Այս մասին հայտարարել է Իրանի Իսլամական Հանրապետության նախագահ Մասուդ Փեզեշքիանը։

Իրանի նախագահի խոսքով՝ նման գործողությունները դիտարկվում են որպես ինքնապաշտպանության իրավունքից բխող քայլեր։ Նա ընդգծել է, որ Թեհրանը նպատակ չունի հարվածներ հասցնելու տարածաշրջանի այլ երկրներին կամ նրանց հետ հակամարտություն սկսելու։

Փեզեշքիանը այս հայտարարությունն արել է Պակիստանի վարչապետ Շահբազ Շարիֆի հետ ունեցած հեռախոսազրույցի ընթացքում։ Իրանի նախագահի մամուլի ծառայության փոխանցմամբ՝ զրույցի ընթացքում քննարկվել են նաև տարածաշրջանային անվտանգությանն առնչվող հարցեր։

Իրանի ղեկավարի խոսքով՝ Թեհրանի դիրքորոշումը մնում է անփոփոխ․ հարվածների թիրախ կդառնան միայն այն ռազմական օբյեկտները, որոնցից, ըստ Իրանի, իրականացվում են գործողություններ իր տարածքի դեմ։