Իսրայելը մասնակիորեն բացել է օդային տարածքը

Իսրայելը Իրանի հետ ներկայիս էսկալացիայի սկզբից ի վեր առաջին անգամ մասնակիորեն բացել է երկնքի մեկնման ուղղությունը։ Կիրակի օրը Բեն Գուրիոն օդանավակայանից իրականացվել են ուղևորներով առաջին չվերթները, հայտնել է օդային նավահանգստի մամուլի ծառայությունը, փոխանցում է ՌԻԱ Նովոստի-ն։

«Օդանավակայանը մասնակիորեն վերսկսել է աշխատանքը՝ սպասարկելով մեկնող չվերթները»,- նշել են մամուլի ծառայությունից։

Ներկայումս երկրից մեկնող չվերթներն իրականացնում են իսրայելական «El Al», «Israir» և «Arkia» ավիաընկերությունները, սակայն գործում են մի շարք սահմանափակումներ։ Ավիացիոն իշխանությունները հաստատել են, որ մեկ չվերթի համար ուղևորների քվոտան 70-ից բարձրացվել է մինչև 100։

Երկրի տրանսպորտի նախարարությունը նախօրեին զգուշացրել էր, որ այս չվերթներով մեկնող Իսրայելի քաղաքացիները պետք է ստորագրեն հատուկ ձևաթուղթ, որով պարտավորվում են չվերադառնալ երկիր մեկնման օրվանից սկսած առնվազն 30 օր։

Միաժամանակ իսրայելական առաջատար «El Al» ավիափոխադրողը դադարեցրել է տոմսերի վաճառքը մինչև մարտի 21-ը՝ առաջնահերթություն տալով այն ուղևորներին, որոնք տոմսեր էին գնել ռազմական հակամարտության սկսվելուց առաջ և չէին կարողացել լքել Իսրայելը։