Իրանն արձագանքել է Ադրբեջանի հայտարարություններին

Իրանի Իսլամական Հանրապետությունը հայտարարել է, որ իր զինված ուժերը անօդաչու թռչող սարք չեն արձակել Ադրբեջանի Հանրապետության ուղղությամբ։ Այդ մասին ասվում է Իրանի ռազմական գերատեսչության տարածած հայտարարության մեջ։

Հաղորդագրության մեջ ընդգծվում է, որ Թեհրանը հարգում է բոլոր պետությունների ինքնիշխանությունը, հատկապես հարևան և մահմեդական երկրների։ Իրանական կողմը միջադեպի պատասխանատվությունը վերագրել է Իսրայելին՝ նշելով, որ նման գործողությունները նպատակ ունեն տարբեր եղանակներով խաթարել մահմեդական երկրների միջև հարաբերությունները և մեղադրանքը բարդել Իրանի վրա։

Նշվում է նաև, որ փետրվարի 28-ին ԱՄՆ-ն և Իսրայելը ռազմական գործողություն են սկսել Իրանի դեմ։ Հարվածներ են հասցվել մի շարք քաղաքների, այդ թվում՝ Թեհրանին։ Սպիտակ տանը հայտարարել են, որ գործողությունը պայմանավորված է Իրանից եկող ենթադրյալ հրթիռային և միջուկային սպառնալիքներով։ Հարվածների հետևանքով, ըստ հաղորդագրությունների, զոհվել են Իրանի մի շարք բարձրաստիճան պաշտոնյաներ։

Իրանի Իսլամական հեղափոխության պահապանների կորպուսը հայտարարել է պատասխան լայնածավալ գործողության մասին՝ հարվածներ հասցնելով Իսրայելի տարածքում գտնվող թիրախներին։ Հարձակումներ են արձանագրվել նաև Բահրեյնում, Հորդանանում, Քաթարում, Քուվեյթում, ԱՄԷ-ում և Սաուդյան Արաբիայում տեղակայված ամերիկյան օբյեկտների վրա։

Ադրբեջանի ԱԳՆ-ն հայտնել էր, որ Իրանի տարածքից արձակված երկու անօդաչու սարք ընկել է Նախիջևանի օդանավակայանի շրջանում։ Միջադեպի հետևանքով վնասվել է օդանավակայանի շենքը, տուժել են երկու մարդ։ Բաքուն հայտարարել է, որ պահպանում է պատասխան քայլեր ձեռնարկելու իրավունքը։