Իսրայելի ԶՈՒ-ն հայտարարել է՝ ակտիվ ռազմական գործողություններ են իրականացնում Լիբանանի հարավում

Իսրայելի պաշտպանության բանակը հայտարարել է, որ Իրանի դեմ գործողություններին զուգահեռ ակտիվ գործողություններ է իրականացնում նաև Լիբանանի հարավում։ ՑԱՀԱԼ-ի հաղորդագրության համաձայն՝ զինված ուժերը սահմանին մոտ մի քանի հատվածներում զբաղեցրել են դիրքեր՝ առաջապահ պաշտպանության ամրապնդման նպատակով։

Բանակը նաև տեղեկացրել է «Հիզբոլլահի» ենթակառուցվածքների դեմ «թիրախային հարվածների» մասին՝ նշելով, որ դրանք ուղղված են սպառնալիքների չեզոքացմանը և Իսրայելի տարածք ներթափանցման փորձերի կանխմանը։

Պաշտպանության նախարար Իսրայել Կացը հայտարարել է, որ վարչապետ Բենիամին Նեթանյահուի հետ միասին թույլտվություն են տվել զինվորականներին առաջխաղացում իրականացնել և Լիբանանի տարածքում զբաղեցնել լրացուցիչ ռազմավարական նշանակության հատվածներ՝ սահմանամերձ իսրայելական բնակավայրերի գնդակոծությունը կանխելու համար։

Reuters գործակալությունը հիշեցնում է, որ 2024 թվականին «Հիզբոլլահի» հետ ձեռք բերված հրադադարի համաձայնությունից հետո Իսրայելը Լիբանանում պահպանել է ցամաքային զորքերի ներկայությունը հինգ ռազմավարական կետերում։