Ռուսաստանը համաչափ պատասխան կտա․ Մեդվեդևը սպառնացել է Կիևին և միջուկային զենք մատակարարող երկրներին

Ռուսաստանում հայտարարել են, որ Ֆրանսիայի և Մեծ Բրիտանիայի կողմից Կիևին միջուկային տեխնոլոգիաներ փոխանցելու վերաբերյալ Արտաքին հետախուզության ծառայության (ՍՎՌ) տվյալները կարող են արմատապես փոխել իրավիճակը։ Այս մասին տելեգրամյան իր ալիքում գրել է ՌԴ Անվտանգության խորհրդի փոխնախագահ Դմիտրի Մեդվեդևը։

Ռուսական կողմի գնահատմամբ՝ խոսքը ոչ միայն միջազգային իրավական նորմերի հնարավոր խախտման մասին է, այլև պատերազմող երկրին միջուկային զենքի ուղղակի փոխանցման։ Ըստ հայտարարության՝ նման զարգացումը կդիտարկվի որպես էական փոփոխություն առկա անվտանգության միջավայրում։

«Իրադարձությունների նման զարգացման դեպքում Ռուսաստանը ստիպված կլինի օգտագործել ցանկացած, այդ թվում՝ ոչ ռազմավարական միջուկային զենք Ուկրաինայի տարածքում գտնվող այն թիրախների դեմ, որոնք սպառնալիք են ներկայացնում մեր երկրի համար։ Իսկ անհրաժեշտության դեպքում՝ նաև մատակարար երկրների դեմ, որոնք դառնում են Ռուսաստանի հետ միջուկային հակամարտության մեղսակիցներ։ Սա այն համաչափ պատասխանն է, որի իրավունքն ունի Ռուսաստանի Դաշնությունը»,- հավելել է ԱԽ փոխնախագահը: