Նոր նախագիծ՝ որոշ ուսանողներ զինծառայությունից ազատվելու հնարավորություն կստանան
Աշխարհի լավագույն 50 համալսարաններ ընդունված և զինծառայությունից տարկետում ստացած քաղաքացիները ուսումն ավարտելուց հետո, կառավարության կողմից Հայաստանում սահմանված ոլորտում աշխատելով, կարող են ազատվել պարտադիր զինվորական ծառայությունից։ Այս մասին ներկայացնելով «Զինվորական ծառայության և զինծառայողի կարգավիճակի մասին» օրենքում փոփոխություններ և լրացում կատարելու մասին օրինագիծը, ԱԺ գիտության, կրթության, մշակույթի հարցերով հանձնաժողովի նիստում երկրորդ ընթերցմամբ ընդունելու համար հայտարարել է ԿԳՄՍ նախարար Ժաննա Անդրեասյանը։
«Նախագիծը նրա մասին է, որ մեր այն քաղաքացիները, որոնք տարկետում են ստանում և ուսումնառությունը կազմակերպում են արտերկրի հեղինակավոր բուհերում, նաև հնարավորություն ստանան կրթական համապատասխան աստիճանն ավարտելուց հետո վերադառնալ և առնվազն 3 տարի աշխատել համապատասխան ոլորտում Կառավարության սահմանած կարգով, որից հետո կարող են, ըստ էության, ազատվել զինվորական ծառայությունից»,- ասել է Անդրեասյանը:
Առաջինից երկրորդ ընթերցում անցնելու ընթացքում նախագծում բովանդակային փոփոխություններ չեն կատարվել։
Հանձնաժողովը նախագծին տվել է դրական եզրակացություն, և այն երկրորդ ընթերցմամբ կքննարկվի ԱԺ լիագումար նիստում։
