Ձերբակալվել են Վուչիչի, նրա կնոջ ու երեխաների դեմ մահափորձ ծրագրած անձինք
Սերբիայի իրավապահ մարմինները ձերբակալել են երկու անձի, որոնք կասկածվում են երկրի նախագահ Ալեքսանդր Վուչիչի դեմ մահափորձ նախապատրաստելու մեջ։ Տեղեկությունը հրապարակել է հանրապետության Ներքին գործերի նախարարության մամուլի ծառայությունը։
Գերատեսչության հաղորդագրության համաձայն՝ բերման են ենթարկվել Դ. Ռ.-ն (ծնված 1975 թվականին) և Մ. Ռ.-ն (ծնված 1983 թվականին)։ Քննության նախնական տվյալներով՝ նրանք կասկածվում են Սերբիայի սահմանադրական կարգը բռնի ճանապարհով փոխելու և պետական բարձրագույն մարմինների տապալման նպատակով դավադրություն կազմակերպելու մեջ։
Նշվում է, որ ենթադրյալ գործողությունները ներառել են զենքի ձեռքբերում և նախագահ Վուչիչի, նրա կնոջ ու երեխաների, ինչպես նաև ՆԳՆ աշխատակիցների կյանքի դեմ ուղղված հարձակում կազմակերպելու փորձ։
Կասկածյալները կալանավորվել են։ Քրեական գործի նյութերը փոխանցվելու են Կրալևոյի Բարձրագույն դատախազություն՝ հետագա ընթացք ապահովելու նպատակով։
