Ամենակարևորն այն է, որ մենք չդառնանք պատմական հիշողության. նախագահ
Հայաստանի Հանրապետության նախագահ Վահագն Խաչատուրյանը Հունաստան կատարած պետական այցի շրջանակում հարցազրույց է տվել հեղինակավոր «Manifesto» պարբերականին։ Նախագահը խոսել է Հայաստանի արտաքին քաղաքական առաջնահերթությունների, տարածաշրջանային զարգացումների, ինչպես նաև Ադրբեջանի հետ խաղաղության գործընթացի շուրջ իրականացվող քայլերի մասին։
Անդրադառնալով հայ-ադրբեջանական բանակցություններին՝ Վահագն Խաչատուրյանը հիշեցրել է 2025 թվականի օգոստոսի 8-ին Վաշինգտոնում ստորագրված հռչակագիրը, որը ստորագրել են ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը՝ ԱՄՆ նախագահ Դոնալդ Թրամփի վկայությամբ։
«Այն, ինչ տեղի ունեցավ օգոստոսի 8-ին, կարող էր անհավատալի թվալ։ Սակայն դա մեկ օրում տեղի չունեցավ։ Դրան նախորդել է բավականին երկար նախապատրաստական փուլ»,- նշել է նախագահը։
Խաչատուրյանի խոսքով՝ բանակցային գործընթացը գործնական արդյունք է տվել նաև սահմանային իրավիճակի առումով։ Նրա տեղեկացմամբ՝ անցած տարվա հունվարի 25-ից ի վեր սահմանների երկայնքով իրավիճակը հանգիստ է, կրակոցներ չեն արձանագրվել, մինչդեռ նախկինում սահմանային միջադեպերը գրեթե ամենօրյա բնույթ էին կրում։
Նախագահը անդրադարձել է նաև Ադրբեջանի և Թուրքիայի հետ հարաբերությունների կարգավորման շուրջ սփյուռքի որոշ շրջանակների մտահոգություններին։ Նրա խոսքով՝ արտերկրում հայկական համայնքների հետ հանդիպումների ընթացքում զգացվել է ըմբռնում կառավարության քաղաքականության նկատմամբ։
«Նրանց ներկայացրի Հայաստանի տնտեսական և քաղաքական իրավիճակը։ Զգացի, որ կա ըմբռնում մեր կառավարության քայլերի նկատմամբ։ Ամենակարևորն այն է, որ մենք չդառնանք պատմական հիշողության գերիներ և չկտրվենք իրականությունից»,- ընդգծել է նախագահը։
Հարցազրույցում Վահագն Խաչատուրյանը ներկայացրել է նաև հայ-հունական հարաբերությունների ներկա վիճակն ու զարգացման հեռանկարները՝ կարևորելով երկկողմ համագործակցության խորացումը։
