Իրանը խոցելի դիրքում է․ պետք է օգտագործենք այդ պահը․ Կալլաս

Եվրոպական միությունը ձգտում է Իրանի միջուկային ծրագրի շուրջ հարցը կարգավորել դիվանագիտական ճանապարհով։ Այս մասին լրագրողների հետ զրույցում հայտարարել է ԵՄ արտաքին գործերի և անվտանգության քաղաքականության բարձր ներկայացուցիչ Կայա Կալլասը՝ Արտաքին գործերի խորհրդի նիստից առաջ։

Նրա խոսքով՝ տարածաշրջանում լարվածության խորացումը շահեկան չէ որևէ կողմի համար, և անհրաժեշտ է օգտագործել առկա հնարավորությունը՝ քաղաքական լուծում գտնելու նպատակով։ Կալլասը նշել է, որ առաջիկայում սպասվում են բանակցություններ Թեհրանի և Վաշինգտոնի միջև, ինչը կարող է նպաստել գործընթացին։

«Մեզ անհրաժեշտ չէ ևս մեկ պատերազմ այս տարածաշրջանում։ Իրանը ներկայումս առավել խոցելի դիրքում է, և մենք պետք է օգտագործենք այդ պահը՝ դիվանագիտական լուծում գտնելու համար»,- նշել է ԵՄ դիվանագիտության ղեկավարը։

Եվրամիությունը շարունակում է ընդգծել, որ միջուկային հարցերի կարգավորումը պետք է իրականացվի բանակցությունների և միջազգային համագործակցության շրջանակում։