Ես բռնապետ չեմ․ Զելենսկին՝ պատերազմի ավարտի մասին

Ուկրաինայի նախագահ Վլադիմիր Զելենսկին BBC News-ին տված հարցազրույցում արձագանքել է նախկինում հնչեցված այն հայտարարություններին, թե ինքը բռնապետ է և հենց ինքն է սկսել պատերազմը։ Պատասխանելով հարցին նա ասել է․

«Ես բռնապետ չեմ և պատերազմ չեմ սկսել։ Այդ մեղադրանքները չեն համապատասխանում իրականությանը»,- ասել է Ուկրաինայի նախագահը։

Անդրադառնալով հարցին՝ վստահո՞ւմ է արդյոք Թրամփին, Ուկրաինայի նախագահը նշել է, որ խոսքը վերաբերում է ոչ միայն Սպիտակ տան ղեկավարին, այլ Միացյալ Նահանգներին որպես պետություն։ Նրա խոսքով՝ Կիևը ձգտում է ստանալ երկարաժամկետ՝ օրինակ 30 տարվա անվտանգության երաշխիքներ, իսկ այդ ընթացքում ԱՄՆ քաղաքական ղեկավարությունը կարող է մի քանի անգամ փոխվել։

Զելենսկին ընդգծել է, որ նման որոշումները պետք է հաստատվեն ԱՄՆ Կոնգրեսի կողմից, քանի որ նախագահները փոխվում են, մինչդեռ պետական ինստիտուտները շարունակում են գործել։ Նրա խոսքով՝ անվտանգության երաշխիքները պահանջում են ինստիտուցիոնալ աջակցություն, այլ ոչ միայն գործադիր իշխանության մակարդակով համաձայնություն։