Չեն կարող մեզ շանտաժի ենթարկել․ Հունգարիայի ԱԳ նախարար

 Հունգարիայի արտաքին գործերի նախարար Պետեր Սիյարտոն հայտարարել է, որ Ուկրաինայի կողմից «Դրուժբա» նավթատարով ռուսական նավթի տարանցման դադարեցումը Բուդապեշտում դիտարկվում է որպես ինքնիշխանությանը հասցված հարված։ Նա այդ մասին խոսել է հունգարացի լրագրողների հետ զրույցում, իսկ հայտարարությունը հեռարձակվել է M1 հեռուստաալիքով։

«Այսօրվա նիստում ես հստակեցրել եմ, որ մենք չենք աջակցում հակառուսական պատժամիջոցների 20-րդ փաթեթին և չենք թույլատրում այն։ Եվ ես հստակեցրել եմ, որ մենք չենք համաձայնի Ուկրաինային տալ 90 միլիարդ եվրոյի ռազմական վարկ։ Քանի որ ուկրաինացիները չեն կարող մեզ շանտաժի ենթարկել, նրանք չեն կարող վտանգել Հունգարիայի էներգետիկ անվտանգությունը՝ համաձայնության գալով Բրյուսելի և հունգարական ընդդիմության հետ։ Ոչ, հստակ ոչ, հենց դա էլ ես ասացի», - հունգարացի լրագրողների հետ զրույցում նշել է Սիյարտոն։

Նրա խոսքով՝ երկրի էներգամատակարարման անվտանգությանը սպառնացող ցանկացած քայլ կարող է դասվել ինքնիշխանության դեմ ուղղված գործողությունների շարքին։ Սիյարտոն ընդգծել է, որ նավթի մատակարարումների խափանումը լուրջ հետևանքներ կարող է ունենալ Հունգարիայի համար։