Եվրամիության նոր պահանջները՝ Ռուսաստանին
Եվրամիության արտաքին գործերի և անվտանգության քաղաքականության բարձր ներկայացուցիչ Կայա Կալլասը անդամ պետություններին ներկայացրել է փաստաթուղթ, որը ներառում է Ռուսաստանի նկատմամբ պահանջների փաթեթ՝ Ուկրաինայի շուրջ ընթացող դիվանագիտական գործընթացի շրջանակում։ Բանակցություններում միջնորդական դեր է ստանձնել Միացյալ Նահանգները։ Այս մասին հաղորդում են լրատվամիջոցները։
Փաստաթղթում նշվում է, որ եթե Ուկրաինան նվազեցնի կամ վերադասավորի իր զինված ուժերը, ապա Ռուսաստանը պետք է իրականացնի համարժեք քայլեր՝ առանց օկուպացված տարածքների իրավական ճանաչման։ Նշվում է նաև, որ այդ տարածքները ենթակա են ապառազմականացման։ Առանձին կետով ընդգծվում է եվրոպական անվտանգության ապահովումը՝ դադարեցնելով ապատեղեկատվությունը, կիբերհարձակումները, դիվերսիոն գործողությունները, օդային տարածքի խախտումները և ընտրական գործընթացներին միջամտությունը։
ԵՄ պահանջների թվում են նաև ռուսական զորքերի և միջուկային զենքի տեղակայման արգելքը Բելառուսում, Ուկրաինայում, Մոլդովայում, Վրաստանում և Հայաստանում, ինչպես նաև զորքերի դուրսբերումը Աբխազիայից, Հարավային Օսիայից և Մերձդնեստրից։ Փաստաթուղթը նախատեսում է միջազգային իրավունքի պահպանում՝ առանց ռազմական հանցագործությունների համար համաներման, միջազգային քննիչների մուտքի ապահովմամբ և միջազգային պարտավորությունների գերակայությամբ։
Բացի այդ, առաջարկվում է փոխհատուցումների տրամադրում Ուկրաինային և եվրոպական պետություններին ու ընկերություններին՝ ներառյալ շրջակա միջավայրին հասցված վնասի համար։ Ներքին պահանջների շրջանակում խոսվում է ազատ ընտրությունների անցկացման, քաղբանտարկյալների ազատ արձակման, արտաքսված քաղաքացիների վերադարձի, լրատվամիջոցների ազատության և ռեպրեսիվ օրենքների վերացման մասին։
