Ռուբեն Վարդանյանի դատավճիռը արդարադատության նկատմամբ ծաղր է․ Amnesty International

Միջազգային իրավապաշտպան Amnesty International կազմակերպության Արևելյան Եվրոպայի և Կենտրոնական Ասիայի տնօրեն Մարի Ստրութերսը Բաքվի դատարանի կողմից Լեռնային Ղարաբաղի նախկին պետնախարար Ռուբեն Վարդանյանի նկատմամբ կայացված դատավճիռը որակել է որպես արդարադատության նկատմամբ ծաղր։

«16 մեղադրյալների դատապարտումը, որը գագաթնակետին հասավ Ռուբեն Վարդանյանի դեմ դատավճռով, ոչ այլ ինչ է, եթե ոչ ծաղր արդարադատության նկատմամբ։ Այն փաստը, որ Ռուբեն Վարդանյանը և մյուսները՝ իր նման մի քանի քաղաքացիական անձինք, դատվել են ռազմական դատարանում, ինքնին լուրջ մտահոգություններ է առաջացնում և անհամատեղելի է արդար դատավարության երաշխիքների հետ»,- ասվում է միջազգային իրավապաշտպան կազմակերպության հայտարարության մեջ։

Ստրութերսի գնահատմամբ՝ Լեռնային Ղարաբաղի շուրջ տասնամյակներ շարունակվող հակամարտության զոհերը՝ թե՛ Հայաստանում, թե՛ Ադրբեջանում, արժանի են ճշմարտության, արդարության, փոխհատուցման և երաշխիքների, որ նման հանցագործություններն այլևս չեն կրկնվի։

«Այս դատապարտումները միջազգային իրավունքով հանցագործությունների բոլոր զոհերի համար վիրավորանք են»,- նշել է նա։

Կազմակերպությունը հայտարարել է, որ Ռուբեն Վարդանյանի և մյուսների դատավարությունները գործնականում անցկացվել են փակ լսումներով, նրանց դեմ հարուցված գործերը հիմնված են կեղծ ապացույցների վրա, իսկ դատական նիստերը տեղի են ունեցել հայերի համար անհասկանալի լեզվով և պատշաճ չեն թարգմանվել։

Նշվում է նաև, որ «Amnesty International»-ը Ադրբեջանի իշխանություններից պահանջել է տեղեկատվություն դատավարության և ապացույցների վերաբերյալ, սակայն պատասխան չի ստացել։

«Ադրբեջանը պետք է կատարի իր պարտավորությունները մարդու իրավունքների միջազգային իրավունքի համաձայն և ապահովի, որ հանցագործությունների մեջ մեղադրվող բոլոր անձինք դատվեն միջազգային իրավունքի և արդար դատավարության չափանիշների լիարժեք համապատասխանությամբ»,- ասված է կազմակերպության տարածած հայտարարության մեջ։

Հիշեցնենք՝ Բաքվի դատարանը հրապարակել էր Լեռնային Ղարաբաղի նախկին պետնախարար Ռուբեն Վարդանյանի նկատմամբ շինծու քրեական գործով դատավճիռը, ըստ որի՝ Վարդանյանը դատապարտվել է 20 տարվա ազատազրկման։

Մեղադրող դատախազը նրա համար պահանջել էր ցմահ ազատազրկում։

Հավելենք՝ Ռուբեն Վարդանյանը 2023 թվականի սեպտեմբերի 27-ին Ադրբեջանի իրավապահների կողմից ապօրինի ձերբակալվել և տեղափոխվել էր Բաքու՝ Լեռնային Ղարաբաղի դեմ Ադրբեջանի ռազմական ագրեսիայից հետո։ Ադրբեջանում նրան մի քանի հոդվածներով կեղծ մեղադրանքներ են առաջադրվել։