Պաղեստինը պահանջում է պատժամիջոցներ Իսրայելի դեմ

Պաղեստինի իշխանությունները միջազգային կառույցների միջոցով նախաձեռնել են քայլեր՝ Իսրայելի դեմ պատժամիջոցներ սահմանելու նպատակով։ Այս մասին հայտնել է Պաղեստինի արտաքին գործերի նախարարի տեղակալ Օմար Ավադալլան՝ նշելով, որ գործընթացն իրականացվում է ՄԱԿ-ի Անվտանգության խորհրդում, Արաբական պետությունների լիգայում (ԼԱԳ) և Իսլամական համագործակցության կազմակերպությունում (ԻՀԿ)։

Ավադալլայի խոսքով՝ հարցը քննարկվում է նաև ԼԱԳ-ի մշտական ներկայացուցիչների մակարդակով Կահիրեում։ Նա ընդգծել է, որ պաղեստինյան կողմը պատրաստվում է օգտագործել բոլոր հնարավոր հարթակները՝ Իսրայելի որոշումներին հակազդելու համար։

Դիվանագետը հիշեցրել է, որ ԱՄՆ նախկին նախագահ Դոնալդ Թրամփը, ըստ նրա, արաբական և իսլամական երկրներին հավաստիացրել էր, թե չի աջակցի պաղեստինյան տարածքների բռնակցմանը։ Ավադալլան նշել է նաև, որ Իսրայելի հետ հարաբերությունների կարգավորումը մի շարք երկրների կողմից ենթադրում է, որ այդ պետությունները պետք է աշխատեն Իսրայելի կողմից բռնակցման քայլերից հրաժարվելու ուղղությամբ։

Փետրվարի 8-ին Իսրայելը հաստատել է Արևմտյան ափում վերահսկողության ընդլայնման միջոցառումներ, այդ թվում՝ չեղարկել է իսրայելցի վերաբնակներին հողերի վաճառքի արգելքը։ Որոշումը քննադատության է արժանացել մի շարք երկրների և միջազգային կառույցների կողմից, այդ թվում՝ Եվրամիության, ՄԱԿ-ի և Ռուսաստանի ԱԳՆ ներկայացուցիչների մակարդակով։