Պետական միջոցառումներում օրհներգը՝ կենդանի կատարմամբ․ Փաշինյան

Պետական միջոցառումների ժամանակ Հայաստանի Հանրապետության օրհներգը պարտադիր պետք է հնչի կենդանի կատարմամբ։ Այս մասին Կառավարության հերթական նիստում հայտարարել է վարչապետ Նիկոլ Փաշինյանը՝ ներկայացնելով օրհներգի կատարման կարգի պահանջները։

Նրա խոսքով՝ պետական մարմինների կողմից կազմակերպվող յուրաքանչյուր միջոցառում պետք է նախապես ապահովի օրհներգի կենդանի կատարումը։ Այն կարող է իրականացվել թե՛ երգչախմբի, թե՛ նվագախմբի միջոցով։ Վարչապետը նշել է, որ այն գերատեսչությունները, որոնք չունեն համապատասխան կոլեկտիվներ, կարող են հրավիրել կատարողներ՝ միջոցառման բյուջեում նախատեսելով անհրաժեշտ ծախսերը։

Ոչ պետական կառույցների և այլ կազմակերպությունների կազմակերպած հանդիսավոր արարողությունների դեպքում ևս խրախուսվում է կենդանի կատարումը։ Սակայն եթե օգտագործվում է ձայնագրություն, ապա թույլատրվում է միայն պաշտոնապես հաստատված և հասանելի տարբերակը։

Ուսումնական հաստատություններում՝ մանկապարտեզներում, դպրոցներում և քոլեջներում, ուսումնական շաբաթվա սկզբին օրհներգի հնչեցումը սահմանված է օրենքով։ Այն պետք է կատարվի հաստատության սաների կենդանի մասնակցությամբ։

Մանրամասները՝ տեսանյութում։