Ուսումնական հաստատությունների վերաբերյալ 195 դիմում-բողոք, որոնցից 159-ը վերաբերում է դպրոցներին
2025 թվականին ՀՀ կրթության տեսչական մարմին է ստացվել ուսումնական հաստատությունների վերաբերյալ 195 դիմում-բողոք, որոնցից 159-ը վերաբերում է դպրոցներին։ Այս մասին այսօր հրավիրած ասուլիսի ընթացքում հայտնել է տեսչության ղեկավար Վաղարշակ Մատիկյանը։
Նրա խոսքով՝ ստացված բողոքներից 77-ը բավարարվել է, 42-ը վերահասցեագրվել է այլ մարմինների, ևս 64-ի մասով քաղաքացիներին տրվել են պարզաբանումներ, իսկ մի մասը դեռ ընթացքի մեջ է։
Մատիկյանը նշել է, որ ծնողների մտահոգությունները հիմնականում վերաբերում են դպրոցներում բռնության, բուլինգի դեպքերին և դրամահավաքին։
«Վերահասցեագրվածների մի մասն ուղարկվել է համապատասխան ուժային կառույցներին, քանի որ դրանք հիմնականում կապված են ուսումնական հաստատություններում բռնությունների և դրամահավաքների դեպքերի հետ, որոնք դուրս են տեսչական մարմնի լիազորություններից»,- ասել է նա։
Արձագանքելով հարցին, թե ինչու են նման դեպքերն ավելացել, Վաղարշակ Մատիկյանը նշել է, որ դա պայմանավորված է մարդկանց իրազեկվածության բարձրացմամբ։
