ՄՌՏ-ի փոխհատուցման համար գործում են դեպքերի սահմանափակումներ. Անահիտ Ավանեսյան

Առողջության ապահովագրության փաթեթում տարվա առավելագույն շեմ չկա, այսինքն՝ մեկ անձի վրա տարվա ընթացքում ծախսվող գումարի համար առավելագույն սահմանափակում չի գործում։ Այս մասին Ազգային ժողովում Առողջության ապահովագրության համակարգի խնդիրների քննարկման ժամանակ հայտնել է ՀՀ առողջապահության նախարար Անահիտ Ավանեսյանը։

Նրա խոսքով՝ ընդհանուր քանակային ապահովագրության շրջանակում ծառայություններ ստանալու շեմ նույնպես չկա, սակայն առանձին ծառայությունների դեպքում գործում են դեպքերի սահմանափակումներ։ Որպես օրինակ նա նշել է, որ արտահիվանդանոցային կարգով ՄՌՏ հետազոտությունը տարվա ընթացքում փոխհատուցվում է երկու անգամ, և դրանից ավել դեպքերը ապահովագրական փաթեթից դուրս են մնում։ Նույն սահմանափակումը գործում է նաև նեղ մասնագետի խորհրդատվության համար։

Նախարարը հավելել է, որ կան ինչպես ծառայությունների որոշակի շեմեր, այնպես էլ փոխհատուցման սահմանված գներ, և այդ սահմաններից բարձր կոնկրետ ծառայության արժեքը չի փոխհատուցվում։