ՍԱՏՄ ղեկավարը ներկայացրել է դպրոցական սննդի վերահսկման գործընթացը
Ասուլիսի ընթացքում լրագրողը Սննդամթերքի անվտանգության տեսչական մարմնի ղեկավար Տիգրան Պետրոսյանին հարցրել է, թե 2025 թվականին քանի ստուգայց է իրականացվել դպրոցների բուֆետներում, ինչ խախտումներ են արձանագրվել և ինչ միջոցներ են ձեռնարկվել։
Ի պատասխան Պետրոսյանը նշել է, որ դպրոցներում գործում է ծրագիր, որի շրջանակում սնունդը տրամադրվում է պետական միջոցներով՝ գնումների միջոցով, իսկ դպրոցների մեծ մասում գործում են, ինչպես ինքն ասաց, անհատական խոհանոցներ։
Ճշտող հարցին՝ արդյոք տեսչական մարմինը ստուգում է դպրոցներում վաճառվող սնունդը, ՍԱՏՄ ղեկավարը պատասխանել է, որ ստուգումները իրականացվում են, սակայն չի կարող այս պահին նշել դրանց ճշգրիտ թիվը։ Նրա խոսքով՝ եթե եղել են կասեցումներ և տուգանքներ, ապա ստուգումների քանակը մեծ է եղել։
Պետրոսյանը նշել է, որ ծրագրի շրջանակում պետական գնումներով ապահովված սնունդը գրեթե ամբողջությամբ վերահսկվում է, իսկ մասնավոր հատվածում ստուգումներ իրականացվում են բողոքների առկայության դեպքում։ Նա ընդգծել է, որ ներկայումս տեսչական մարմինը օրենքով լիազորված չէ առանց հիմքի դպրոց մտնել և բուֆետը ստուգել։
Միևնույն ժամանակ ՍԱՏՄ ղեկավարը հայտնել է, որ նախատեսվում է այս տարի ավարտել նախագիծը, որի համաձայն արագ արձագանքման բաժնի տեսուչները կկարողանան վկայական ներկայացնելով իրականացնել ստուգումներ։
