Ինչպես են Երևանում իրականացվել հունվարի 23-ի ձյան մաքրման աշխատանքները. Արեյանը մանրամասնել է
Երևանի քաղաքապետի խորհրդական Կամո Արեյանը մանրամասնել է հունվարի 23-ին մայրաքաղաքում իրականացված ինտենսիվ ձյան մաքրման աշխատանքները՝ հիշեցնելով, որ տեղումները սկսվել են առավոտյան ժամը 10-ից և շարունակվել մինչև ուշ երեկո։
Նրա խոսքով՝ «Հունվարի 23-ին ժամը 10:30-ի դրությամբ ԵԱՍՄ հիմնարկի բոլոր մեքենաներն աղով ու ավազով բեռնված ամբողջությամբ տեղակայված են եղել վարչական շրջաններում՝ ըստ նախապես մշակված դիսլոկացիոն սխեմայի՝ 49 մեքենա (37 բազմաֆունկցիոնալ մեծ և 12 փոքր մեքենա)»։
Արեյանը նշել է, որ միաժամանակ մոբիլիզացվել է նաև Երևանի կանաչապատման ՀՈԱԿ-ը։
Նրա փոխանցմամբ՝ աշխատանքները մեկնարկել են մոտ ժամը 12-ին։ «2-3 ժամ հետո պարոն Կատվալյանի կողմից ինձ տրամադրվել է էլեկտրոնային սխեմա, թե որ մեքենան որ հատվածում է գտնվում, և այդպես շարունակվել են աշխատանքները մինչև ուշ երեկո։ Առավոտյան մոբիլիզացվել են նաև կանաչապատման ՀՈԱԿ-ի աշխատակիցները, որոնք մաքրել են բոլոր ստորգետնյա ու վերգետնյա անցումները, շենքեր ու այգիներ տանող աստիճանները»։
Արեյանի տեղեկացմամբ՝ ընդհանուր առմամբ ներգրավվել է 137 միավոր տեխնիկա, որոնցից 107-ը եղել են ԵԱՍՄ հիմնարկի, իսկ 30-ը՝ տարբեր ֆունկցիոնալ կառույցների մեքենաներ։ Կանաչապատման ՀՈԱԿ-ից այդ երկու օրերի ընթացքում աշխատել է 650 բանվորական ուժ։
«23-լույս 24-ի գիշերը ողջ տեխնիկան դուրս է եկել փողոց և մշակել բոլոր փողոցները։ Հունվարի 24-ի դրությամբ մայրաքաղաքի բոլոր կենտրոնական ու մասամբ երկրորդային փողոցները լրիվ մաքրված են եղել ձյան ու սառույցի ծածկույթից», – ասել է նա։
Խոսելով խնդիրների մասին՝ Արեյանը նշել է, որ հունվարի 23-ին մայրաքաղաքի գրեթե ողջ տարածքում գրանցվել են խցանումներ, սակայն հիմնական դժվարությունները եղել են Կենտրոն վարչական շրջանում։
«Մենք քննարկել ենք ԵԱՍՄ-ի պատճառները։ Իմ կասկածները, որ ուշ է մտել տեխնիկան, այո, եղել են ուշ մտնելու ժամեր, և դա պայմանավորված է եղել տրանսպորտի երթևեկի ինտենսիվությամբ։ Ուղղակի ԵԱՍՄ մեքենաների մեխանիզմները չեն կարողացել մտնել երթևեկի մեջ, ստիպված ժամը 2-ից հետո դիմել ենք պարեկային ծառայությանը, որը սկսել է մեր մեքենաների համար ճանապարհ բացել, և մեքենաները կարողացել են աղ ու ավազով մշակել փողոցները։ Դա տևել է 6 ժամ՝ ժամը 14:30-15:00-ից մինչև 21:00-21:30 Կենտրոնում։ Ժամը 19:30-20:00-ի դրությամբ ամբողջապես մաքուր է եղել Նոր Նորք, Ավան, Քանաքեռ-Զեյթուն, Արաբկիրի հյուսիսային գոտին, այդ ժամի դրությամբ խնդիրը դարձյալ մնում էր Կենտրոնում՝ խցանումներ, տևական կանգ», – ասել է նա։
Ի պատասխան բնակչության դժգոհություններին՝ Արեյանը ընդգծել է, որ կատարվել են ինտենսիվ աշխատանքներ, սակայն Կենտրոն վարչական շրջանում առկա խցանումները որոշակիորեն խանգարել են գործընթացին։
Նա տեղեկացրել է նաև. «1000 տոննա աղ ու ավազի խառնուրդ ենք ծախսել 2 գիշերը։ Սա այն դեպքում, երբ 10 հազար տոննա ծախսել էինք դեկտեմբերի 27-ից մինչև հունվարի 23-ը։ Նախորդ տարիներին նույն ժամամակահատվածը հազիվ 5-6 հազար տոննա է եղել, անգամ ինտենսիվ սեզոնում»։
