ՆԳ նախարարը` 2025 թվականին կատարված սպանությունների մասին
Ներքին գործերի նախարարության 2025 թվականի գործունեության հաշվետվության քննարկման ընթացքում նախարար Արփինե Սարգսյանը հայտնել է, որ տարվա ընթացքում առգրավվել է տարբեր տեսակի 768 կգ թմրամիջոց, ինչը 80 տոկոսով գերազանցում է նախորդ տարվա ցուցանիշը։ Առգրավվել է նաև 2,5 տոննա ապօրինի որսած ձուկ, բացահայտվել են խոշորամասշտաբ ներդրումային խարդախություններով զբաղվող 4 խումբ։
Նախարարի խոսքով՝ առգրավված, հայտնաբերված և կամավոր հանձնված հրազենի քանակը նախորդ տարվա համեմատ աճել է 42,2 տոկոսով։ Հայտնաբերվել է պետությանը և համայնքներին պատճառված 25 մլրդ դրամի նյութական վնաս։ Ձերբակալված և կալանավորված անձանց վերաբերյալ ուղեկցման հայտերը կատարվել են մոտ 98 տոկոսով։
Քրեական ոստիկանության կողմից 2025 թվականին չի արձանագրվել չբացահայտված սպանության որևէ դեպք, ինչը Արփինե Սարգսյանը կարևորել է հանցավորության կանխարգելման համատեքստում։
Պարեկային ծառայության կողմից բացահայտված հանցագործությունների թիվը 2024 թվականին կազմել է 11 948, իսկ 2025 թվականին՝ 14 969։ Ոստիկանության կողմից վարորդական իրավունքից զրկման դեպքերի թիվը կազմել է 5435, մինչդեռ ճանապարհային ոստիկանության նախորդ երեք տարիների միջին տարեկան ցուցանիշը եղել է 764։
Նշվել է նաև, որ Պարեկային ծառայության ներդրումից ի վեր ճանապարհատրանսպորտային պատահարներից զոհերի թվի նվազման միտում է արձանագրվում։ 2024 թվականին զոհերի թիվը 2023-ի համեմատ նվազել է 45-ով, իսկ 2025 թվականին՝ ևս 50-ով։
Վարչական իրավախախտումների մասով ևս գրանցվել է արդյունավետության բարձր ցուցանիշ։ 2025 թվականին Պարեկային ծառայությունը կազմել է շուրջ 1 մլն արձանագրություն, մինչդեռ Ճանապարհային ոստիկանության նախորդ երեք տարիների տարեկան միջին ցուցանիշը կազմել է մոտ 300 000։
