Բքի պատճառով Սյունիքի 40 դիմորդ չի կարողացել ներկայանալ քննության. մանրամասներ

Այսօր Սյունիքի մարզում տիրող անբարենպաստ եղանակի և փակ ճանապարհների պատճառով 40 դիմորդ չի կարողացել հասնել քննական կենտրոն՝ մասնակցելու Հայոց լեզվի միասնական քննությանը։

Գնահատման և թեստավորման կենտրոնի (ԳԹԿ) մամուլի խոսնակ Խաչանուշ Գրիգորյանը NEWS.am-ին հայտնել է, որ մարզի 158 դիմորդից այս պահին Գորիսում քննություն է հանձնում միայն 118-ը։ Մնացած 40 դիմորդները Սիսիանի տարածաշրջանից են, ովքեր բքի պատճառով չեն կարողացել տեղ հասնել։

«Հայոց լեզվի միասնական քննությունը մեկնարկել է ժամը 11։30–ին և կտևի 3 ժամ։ Քննության ավարտից հետո ԳԹԿ–ն կքննարկի բացականերին լրացուցիչ հնարավորություն տալու տարբերակը»,– նշել է խոսնակը։

Նա ընդգծել է, որ որոշումը միանշանակ բխելու է դիմորդների շահերից, քանի որ բացակայությունը պայմանավորված է եղել նրանց կամքից անկախ հանգամանքներով։