ԵՄ-ն կնվազեցնի մի շարք ուկրաինական գյուղատնտեսական ապրանքների մաքսատուրքերը

Եվրոպական Միության խորհուրդը որոշել է կրճատել կամ ամբողջությամբ վերացնել մի շարք ուկրաինական գյուղատնտեսական ապրանքների մաքսատուրքերը: Դրանց թվում են կաթնամթերքը, թարմ մրգերն ու բանջարեղենը, ինչպես նաև միսը և մսամթերքը: Այս մասին ասվում է ԵՄ խորհրդի որոշման մեջ։

«Այսօրվա որոշումը վերահաստատում է ԵՄ-ի կողմից Ուկրաինային ցուցաբերվող շարունակական և համապարփակ աջակցությունը Ռուսաստանի կողմից չհրահրված և անհիմն ռազմական ագրեսիայի սկսվելուց ի վեր: Մենք օգնում ենք Ուկրաինային ռազմական և ֆինանսական առումով, բայց մենք պետք է նաև աջակցենք նրան առևտրի ազատականացման միջոցով», - ասել է Դանիայի արտաքին գործերի նախարար Լարս Լյոկե Ռասմուսենը։

Ուկրաինական ապրանքների մուտքը ԵՄ շուկա կախված կլինի արտադրական ստանդարտների աստիճանական համապատասխանեցումից ԵՄ ստանդարտներին՝ կենդանիների բարեկեցության, թունաքիմիկատների օգտագործման և անասնաբուժական դեղամիջոցների օգտագործման ոլորտներում։

Փաստաթուղթը նաև նախատեսում է պաշտպանության մեխանիզմ, որը կարող է ակտիվացվել կողմերից յուրաքանչյուրի կողմից շուկայի խափանումների դեպքում: Առավել զգայուն ապրանքների համար՝ ինչպիսիք են շաքարը, թռչնամիս, ձուն, ցորենը, եգիպտացորենը և մեղրը, ազատականացումը մնում է սահմանափակ և կներդրվի աստիճանաբար։ Մաքսատուրքերի լրիվ վերացումը հնարավոր է նախ ավելի քիչ զգայուն կատեգորիաների համար, այդ թվում՝ կաթի և կաթնամթերքի։