Հայաստանը՝ ԱՄՆ ներգաղթային վիզաների կասեցված երկրների թվում․ որոշումն ուժի մեջ մտավ

Հունվարի 21-ից ուժի մեջ է մտել ԱՄՆ իշխանությունների որոշումը՝ անորոշ ժամկետով դադարեցնել ներգաղթային վիզաների դիմումների վերջնական մշակումը 75 երկրի քաղաքացիների համար։ Սահմանափակումը վերաբերում է Աֆրիկայի, Ասիայի, Լատինական Ամերիկայի, Մերձավոր Արևելքի և Եվրոպայի մի շարք երկրներին, այդ թվում՝ Ռուսաստանին, Բելառուսին, Ադրբեջանին, Հայաստանին, Վրաստանին, Ղազախստանին, Ղրղզստանին, Մոլդովային և Ուզբեկստանին։

Որոշման մասին նախապես հայտարարվել էր հունվարի 14-ին՝ ԱՄՆ Պետդեպարտամենտի պաշտոնական կայքում հրապարակված հաղորդագրության միջոցով։ Այն ընդունվել է ամերիկյան իշխանությունների կողմից ներգաղթային վիզաների տրամադրման ներքին կանոնների վերանայման շրջանակում։

ԱՄՆ Պետդեպարտամենտում նշել են, որ փոփոխությունները վերաբերում են այսպես կոչված «բարձր ռիսկային երկրների» քաղաքացիներին։ Ըստ ամերիկյան կողմի՝ նպատակն է համոզվել, որ ԱՄՆ ժամանող միգրանտները չեն օգտվի սոցիալական նպաստներից և չեն դառնա բեռ հասարակության համար։

Միևնույն ժամանակ նշվում է, որ դիմորդները կարող են շարունակել ներկայացնել վիզայի դիմումներ և մասնակցել հարցազրույցներին ու հանդիպումներին, սակայն գործընթացը չի հասնի վերջին փուլին՝ վիզայի տրամադրմանը։ Սահմանափակումը վերաբերում է միայն ներգաղթային վիզաներին, մասնավորապես՝ աշխատանքի կամ ընտանիքի վերամիավորման նպատակով։ Ոչ ներգաղթային վիզաները՝ ուսանողական, զբոսաշրջային և գործարար, կտրամադրվեն նախկին ռեժիմով։