Մեկ ամսում Կիևը լքել է 600 հազար բնակիչ․Կլիչկո
Ուկրաինայի մի շարք տարածաշրջաններում բնակչությունը բախվում է ջրամատակարարման, ջեռուցման և էլեկտրաէներգիայի լուրջ խնդիրների, որոնցից առավել ծանր իրավիճակ է արձանագրվում մայրաքաղաք Կիևում։ Քաղաքի քաղաքապետ Վիտալի Կլիչկոյի գնահատմամբ՝ Կիևը մոտենում է հումանիտար ճգնաժամի եզրին։
The Times պարբերականին տված հարցազրույցում Կլիչկոն հայտնել է, որ միայն 2026 թվականի հունվար ամսվա ընթացքում քաղաքը լքել է մոտ 600 հազար բնակիչ։ Նրա խոսքով՝ որոշ բնակարաններում սանիտարական պայմանները խաթարվել են, քանի որ ջրամատակարարման համակարգերում ջուրը սառել է։
Քաղաքապետը նշել է, որ բնակչության արտահոսքը պայմանավորված է ոչ միայն ենթակառուցվածքային խնդիրներով, այլև ընդհանուր անորոշությամբ ու անվտանգային մտահոգություններով։ Նրա գնահատմամբ՝ կոմունալ համակարգերի խափանումները զգալիորեն բարդացնում են առօրյա կյանքը։
