Գրենլանդիայի շուրջ վեճը հետաձգել է Ուկրաինային 800 միլիարդ դոլարի աջակցության ծրագիրը. FT
Եվրամիության երկրների և ԱՄՆ նախագահ Դոնալդ Թրամփի միջև Գրենլանդիայի հարցով առաջացած հակասությունները խաթարել են Ուկրաինային տնտեսական աջակցության վերաբերյալ համաձայնագրի ստորագրման ծրագրերը։ Financial Times-ը, վկայակոչելով վեց պաշտոնյայի, գրում է, որ գործընթացի հետաձգման վրա ազդել է նաև Թրամփի նախաձեռնած «Գազայի խաղաղության խորհուրդ» գաղափարը։
Պարբերականի աղբյուրների փոխանցմամբ՝ Համաշխարհային տնտեսական ֆորումի շրջանակում Դավոսում նախատեսված էր ստորագրել Ուկրաինայի հետպատերազմյան վերականգնման համար նախատեսված «բարեկեցության ծրագիրը», սակայն այդ քայլը հետաձգվել է։ Ծրագիրը ենթադրում էր Կիևին մինչև 800 միլիարդ դոլարի ֆինանսական աջակցություն։
Նախատեսվում էր, որ նախաձեռնությունը կհամաձայնեցվի Ուկրաինայի, Եվրամիության անդամ երկրների և ԱՄՆ-ի միջև՝ որպես համատեղ տնտեսական աջակցության հիմք։ Սակայն ԵՄ շրջանակում առաջացած քաղաքական տարաձայնությունները խոչընդոտել են գործընթացի առաջընթացը։
FT-ի մեկ աղբյուրի խոսքով՝ եվրոպական երկրները չեն կարող անտեսել ԱՄՆ գործողությունները Գրենլանդիայի շուրջ և միաժամանակ համագործակցել Վաշինգտոնի հետ Ուկրաինայում խաղաղ կարգավորման հարցում։ Մեկ այլ աղբյուր նշել է, որ ներկայում եվրոպական պետությունները շահագրգռված չեն Դոնալդ Թրամփի հետ որևէ համաձայնության առաջընթաց հրապարակային ցույց տալու մեջ։
