Թրամփն առաջարկ է արել Էրդողանին
ԱՄՆ նախագահ Դոնալդ Թրամփը նամակ է ուղարկել իր թուրք գործընկեր Ռեջեփ Թայիփ Էրդողանին՝ հրավիրելով նրան միանալ Գազայի խաղաղության խորհրդին, հայտարարել է Թուրքիայի առաջնորդի գրասենյակը։
«2026 թվականի հունվարի 16-ին ԱՄՆ նախագահ Դոնալդ Թրամփը՝ որպես խաղաղության խորհրդի հիմնադիր նախագահ, նամակ է ուղարկել Թուրքիայի նախագահ Ռեջեփ Թայիփ Էրդողանին՝ հրավիրելով նրան դառնալ խաղաղության խորհրդի հիմնադիր անդամներից մեկը», - հայտարարության մեջ նշել է Թուրքիայի նախագահի աշխատակազմի հաղորդակցության վարչության ղեկավար Բուրհանեթթին Դուրանը։
Թրամփն ավելի վաղ հայտարարել էր Գազայի խաղաղության խորհրդի ստեղծման մասին և խոստացել էր շուտով հրապարակել դրա անդամներին։ Խորհրդի կազմում են ԱՄՆ պետքարտուղար Մարկո Ռուբիոն, Թրամփի հատուկ դեսպանորդ Սթիվ Վիտկոֆը և ամերիկացի առաջնորդի փեսան՝ ներդրող Ջարեդ Քուշները, Մեծ Բրիտանիայի նախկին վարչապետ Թոնի Բլեյրը, Համաշխարհային բանկի նախագահ Ազհայ Բանգան և ԱՄՆ ազգային անվտանգության հարցերով խորհրդականի տեղակալ Ռոբերտ Գաբրիելը, հայտարարել է Սպիտակ տունը շաբաթ օրը։
