Հայաստանի դիրքորոշումը չի փոխվել. Ռուբեն Ռուբինյան

Մեր դիրքորոշման մեջ փոփոխություն չի եղել․ Հայաստան-Թուրքիա հարաբերությունների կարգավորման գործընթացը և Հայաստան-Ադրբեջան գործընթացը տարբեր գործընթացներ են, սակայն, քանի որ դրանք նույն տարածաշրջանում են, կարող են փոխազդել միմյանց վրա։ Այս մասին Ազգային ժողովում լրագրողների հետ ճեպազրույցում ասել է ԱԺ փոխխոսնակ Ռուբեն Ռուբինյանը՝ անդրադառնալով այն հանգամանքին, որ Թուրքիան շարունակում է կապել հայ-թուրքական գործընթացը հայ-ադրբեջանականի հետ։

Նրա խոսքով՝ Հայաստանը կարծում է, որ Հայաստան-Թուրքիա կարգավորման գործընթացում առաջընթացը ոչ միայն չի վնասի Հայաստան-Ադրբեջան գործընթացին, այլև կարող է նպաստել դրան և նոր ազդակ հաղորդել։ Ռուբինյանը նշել է նաև, որ հնարավոր չէ չնկատել Հայաստան-Ադրբեջան գործընթացում գրանցված առաջընթացը՝ հիշատակելով օգոստոսի 8-ի խաղաղության հռչակագիրը, երկաթգծի առնվազն մասնակի ապաշրջափակումը և այլ քայլեր։

ԱԺ փոխխոսնակի գնահատմամբ՝ ընդհանուր առմամբ բոլոր գործընթացները զարգանում են դրական ուղղությամբ, և արդեն կան որոշ արդյունքներ, ինչպես նաև ակնկալվում են նոր արդյունքներ։