Վարդան Ղուկասյանը հիվանդանոցից տեղափոխվել է ԱԱԾ մեկուսարան. Զարուհի Փոստանջյան
Գյումրու համայնքապետ Վարդան Ղուկասյանը հիվանդանոցից տեղափոխվել է ԱԱԾ ձերբակալվածների պահման վայր։ Այս մասին տեղեկացրել է նրա պաշտպան Զարուհի Փոստանջյանը՝ տեղի ունեցածը որակելով որպես ծանր հանցագործություն։
Ըստ փաստաբանի՝ առկա է բժշկական ախտորոշում, որն անհամատեղելի է կալանքի տակ գտնվելու հետ։ Փոստանջյանը նշել է, որ Ղուկասյանին քրեակատարողական հիմնարկ տեղափոխելը կարող է հանգեցնել մահվան, քանի որ տվյալ հաստատությունում չկա համապատասխան բժշկական անձնակազմ, և ներկա է միայն բուժքույր։
Իրավիճակն էլ ավելի է սրվել, երբ պաշտպանական կողմը Ղուկասյանի համար «Շտապօգնություն» է հրավիրել։ Զարուհի Փոստանջյանի պնդմամբ՝ ՔԿՀ-ի աշխատակիցները խոչընդոտել են բժիշկների աշխատանքը՝ թույլ չտալով նրանց մուտք գործել մեկուսարանի տարածք և օգնություն ցուցաբերել իր պաշտպանյալին։
