Լուկաշենկոն՝ Բելառուսի թշնամիների մասին
Բելառուսի նախագահ Ալեքսանդր Լուկաշենկոն հայտարարել է, որ հանրապետությունը ներկայում թշնամիներ չունի, սակայն, նրա խոսքով, կարևոր է ժամանակին նկատել հնարավոր հակառակորդներին։ Այս մասին նա ասել է ուղղափառ Սուրբ Ծննդյան տոնի առթիվ՝ այցելելով Մինսկի շրջանի եկեղեցներից մեկը։
Լուկաշենկոն նշել է, որ ժամանակակից աշխարհը չափազանց բարդ և խճճված է, ինչի պայմաններում կարևոր է ունենալ հոգևոր ուղեցույց։ Նրա կարծիքով՝ սրբապատկերը կարող է օգնել այս «մութ ու անորոշ» աշխարհում գտնել ճիշտ ուղին։
Այցի ընթացքում Լուկաշենկոն տաճարին նվիրել է Աստվածամոր «Մինսկյան» սրբապատկերի կրկնօրինակը։
Աստվածամոր «Մինսկյան» սրբապատկերը, ըստ պատմական տվյալների, հայտնաբերվել է 1500 թվականին Սվիսլոչ գետի ջրերում, որը հոսում է Մինսկով։ Այդ ժամանակից ի վեր այն մշտապես գտնվում է քաղաքում։ Սրբապատկերը պահպանվել է ինչպես խորհրդային իշխանությունների օրոք եկեղեցու դեմ հալածանքների ժամանակ, այնպես էլ Հայրենական մեծ պատերազմի տարիներին։ 1945 թվականից այն պահվում է Սուրբ Հոգու մայր տաճարում։
