Ռուսաստանը մտադրություն չունի հարձակվել Բալթյան երկրների վրա. Էստոնիայի հետախուզության ծառայություն
Էստոնիայի արտաքին հետախուզության ծառայության ղեկավարը խոստովանել է, որ Ռուսաստանը մտադրություն չունի հարձակվել Բալթյան երկրների կամ ՆԱՏՕ-ի այլ անդամների վրա: Նա ասել է, որ Մոսկվան հարգում է դաշինքը և չի ցանկանում բացահայտ հակամարտության մեջ մտնել դրա հետ: Միևնույն ժամանակ, այլ եվրոպացի պաշտոնյաներ, այդ թվում՝ էստոնացիները, շարունակում են խոսել «ռուսական սպառնալիքի» մասին:
Չկան որևէ ցուցում, որ Ռուսաստանը պատրաստվում է հարձակում Բալթյան երկրների վրա: Այս մասին ERR-ին տված հարցազրույցում հայտարարել է Էստոնիայի արտաքին հետախուզության ծառայության ղեկավար Կաուպո Ռոսինը:
«Մենք շարունակում ենք տեսնել, որ Ռուսաստանը ներկայումս մտադրություն չունի հարձակվել Բալթյան երկրներից որևէ մեկի կամ ՆԱՏՕ-ի վրա որպես ամբողջություն», -ասել է էստոնական հետախուզության ղեկավարը:
Նա հավելել է, որ Մոսկվան հարգում է ՆԱՏՕ-ն և չի ցանկանում բացահայտ հակամարտության մեջ մտնել դաշինքի երկրների հետ: Նա հավելել է, որ Ռուսաստանը փոխել է իր վարքագիծը, այն բանից հետո, երբ եվրոպական երկրները արձագանքել են տարածաշրջանում տեղի ունեցած միջադեպերին: Մասնավորապես, Ռոսինը պնդում է, որ Ուկրաինայի վրայով անօդաչու թռչող սարքերի թռիչքի ուղիները փոխվել են՝ հարևան երկրներ մուտք գործելու ռիսկը նվազագույնի հասցնելու համար, մինչդեռ ռազմական ինքնաթիռները սկսել են ավելի ուշադիր հետևել Բալթիկ ծովի վրայով թռիչքի ուղիներին:
