Ադրբեջանի ԱԳ նախարարը՝ Թուրքիայից դեպի Հայաստան իրականացվող չվերթերի մասին

Ադրբեջանի արտաքին գործերի նախարար Ջեյհուն Բայրամովը տարվա ամփոփիչ ասուլիսում հայտարարել է, որ Թուրքիան Ադրբեջանի համար եղբայրական պետություն է, իրենք դաշնակիցներ են և Թուրքիան միշտ աջակցել է Ադրբեջանին Հայաստանին վերաբերող հարցերում:

«44-օրյա պատերազմից հետո Թուրքիայի և Հայաստանի միջև հարաբերությունների կարգավորման գործընթացը նույնպես իրականացվել է համակարգված ձևով: Սա դրական արդյունքներ է տալիս:

Իմ գործընկեր Հաքան Ֆիդանը նույնպես Թուրքիայի խորհրդարանում հայտարարել է, որ Թուրքիայի և Հայաստանի հարաբերությունները կախված են Ադրբեջանի և Հայաստանի հարաբերություններից: Վստահ եմ, որ այս աշխատանքը կշարունակվի: Հաջորդ տարվանից սկսած Թուրքիայից դեպի Հայաստան չվերթների ավելացումը մեզ համար նորություն չէ, մենք տեղյակ ենք այդ որոշման մասին»,- ասել է նա:

Ավելի վաղ հայտնել էինք, որ մարտից սկսած՝ «Թուրքական ավիաուղիներ» ավիաընկերությունը կսկսի ուղիղ չվերթեր իրականացնել դեպի Երևան:

2026 թվականի մայիսի 14-ից սկսած՝ Ստամբուլ-Երևան չվերթերի շաբաթական հաճախականությունը կհասնի 10-ի։ Արդեն հունիսի 15-ից սկսած՝ չվերթերը կիրականացվեն շաբաթական 14 անգամ։